Gəncədə bir sıra küçələrin asfalt örtüyü yararsız haldadır. Bu haqda Gencexeber.az 6 yanvar tarixində məlumat verir.
Həmin küçələrdən bir neçəsini təqdim edirik. Nəriman Nərimanov prospekti, 6-cı döngədə bir vaxtlar sakinlərin öz vəsaiti hesabına salınmış asfalt örtüyündə çalalar əmələ gəlib. Bu səbəbdən yağmurlu hava şəraitində müxtəlif ölçüdə gölməçələr yaranır. Bu hal sakinlərin gediş-gəlişini çətinləşdirir.
Təmirə ehtiyacı olan ərazilərdən daha biri Mövsüm Kamandarov küçəsinin 20 Yanvar küçəsi və Atabəylər prospekti ilə kəsişməsidir. Burada asfalt örtüyünə dəfələrlə yamaq vurulsa da, yenə çalalar yaranıb.
Natəvan (Türklər) qəsəbəsi, 8-ci küçədə ümumiyyətlə asfalt örtüyü yoxdur. Sakinlərin sözlərinə görə, yağış yağanda küçə keçilməz olur. Onlar paltarlarının, xüsusilə də ayaqqabılarının palçıq içində olduğunu bildirirlər.
Muxtar Hacıyev küçəsində isə yolun bir hissəsində asfalt örtüyü yoxdur. Burada da gölməçələr əmələ gəlir və həmin ərazi palçıq içində olur. Bu hal həm piyada, həm də sürücülərə çətinlik yaradır.
