Gəncədə təltifetmə mərasimi keçirilib. Bu haqda 30 dekabr tarixində Gənclər və İdman Baş idarəsinə istinadən məlumat veririk.
Mərasim Gənclər və İdman Baş İdarəsinin təşkilatçılığı ilə baş tutub və ilin yekunlarına həsr olunub. Tədbirdə Baş İdarənin rəisi Həmid Nəsirov çıxış edərək il ərzində əldə olunmuş nəticələr haqqında məlumat verib. O, 2022-ci ilin Gəncə idmanı üçün uğurlu bir il olduğunu qeyd edib.
Tədbirdə “Şöhrət” ordenli, Prezident mükafatçısı, Əməkdar məşqçi Elçin Zeynalov, Gəncə Şəhər 1 nömrəli Uşaq-Gənclər İdman-Şahmat Məktəbinin baş təlimatçısı, “Şöhrət” ordenli Əli Hacıyev, Kikboksinq üzrə şəhərin baş məşqçisi İlqar Alıyev, Azərbaycan Karate-do Federasiyasının Qərb Regional şöbəsinin rəhbəri Sahib Rzayev çıxış edərək, idmançıları 2022-ci ildə əldə etdikləri nailiyyətlər münasibətilə təbrik ediblər və onlara növbəti ildə də yeni uğurlar arzulayıblar.
Sonra Dünya və Avropa yarışlarında uğurlu nəticələr əldə etmiş idmançılar haqqında hazırlanmış videoçarx nümayiş olunub. İl ərzində uğurlu nəticələr əldə etmiş idmançılar və məşqçilər Gənclər və İdman Baş İdarəsi tərəfindən fəxri diplomlarla təltif ediliblər.
