Gəncədə güclü küləyin fəsadları aradan qaldırılır. Bu haqda 15 iyul tarixində MKTİB-yə istinadən məlumat veririk.
Şəhərimizdə təbiət hadisəsi zamanı dam örtüyünün bir hissəsi dağılan, Gülüstan qəsəbəsində yerləşən 20A saylı yaşayış binasında bir müddətdir ki, aparılan təmir-bərpa işləri başa çatıb.
Tikilinin dam örtüyünün 571 kvadratmetr sahəsi sökülərək yenilənib. Mənzil Kommunal Təsərrüfatı İstehsalat Birliyi tərəfindən dam örtüyünün yeni taxta karkası yığılıb və "profnastil" adlanan metal konstruksiya ilə örtülüb.
Həmçinin qəsəbədəki 20B saylı yaşayış binasının güclü küləkdən zərər çəkmiş dam örtüyü də qurumun əməkdaşları tərəfindən yenidən qurulub. İşlər binanın 551 kvadratmetr sahəsində aparılıb. Hazırda tikilinin dam örtüyünün metal "profnastillərinin" bərkidilmə işləri tamamlanmaq üzrədir.
Bundan başqa, MKTİB tərəfindən şəhərin digər ərazilərində də yaşayış binalarının dam örtüyü və novdan sistemində yaranan nasazlıqlar aradan qaldırılır.
