Gəncədə köhnə borular sakinlər üçün çətin anlar yaşadır. Bu haqda 17 may tarixində Kəpəz televiziyasına istinadən məlumat veririk.
Sözügedən hal şəhərin Üzeyir Hacıbəyov küçəsindəki 25 saylı binada müşahidə olunur. Sakinlərin sözlərinə görə, kanalizasiya boruları köhnəldiyi üçün çirkli sular zirzəmiyə dolur. Bu səbəbdən ətrafda kəskin qoxu yaranır. Onlar, həmçinin bildirirlər ki, aşağı mərtəbədə yerləşən mənzillər bu səbəbdən nəm çəkir.
Vətəndaşlar aidiyyəti qurumlara bir neçə dəfə müraciət etsələr də, heç bir tədbir görülməyib.
“Burada iydən durmaq mümkün deyil. Evlərimizə qoxu dolur, həşəratlar məskunlaşır. Buradan keçə bilmirik. Taksi çağırırıq, gəlmir ki, ora giriləsi yer deyil. Qoxudan da evlərə girmək mümkün olmur”.
Əraziyə Gəncə Sukanal TSC-nin əməkdaşları cəlb ediliblər. Bildirilib ki, sözügedən hala səbəb bəzi sakinlərin səhlənkarlığı nəticəsində istismar müddətini başa vuran boru və kanalizasiya sistemlərinin qarşısının tutulmasıdır.
