Gəncədə "Dördüncü Sənaye İnqilabı dövründə elm və texnologiyaların mövcud vəziyyəti və inkişaf perspektivləri” adlı Beynəlxalq Elmi-Praktik Konfransın plenar iclasının xarici və yerli məruzəçiləri ilə görüş keçirilib. Bu haqda 10 may tarixində ATU-ya istinadən xəbər veririk.
15 ölkənin iştirakı ilə baş tutan görüş Azərbaycan Texnologiya Universitetinin rektoru vəzifəsini müvəqqəti icra edən dosent Yaşar Ömərovun təşkilatçılığı ilə olub. Burada Y.Ömərov uğurlu çıxışlarına və konfransın işinə töhfə verdiklərinə görə məruzəçilərə təşəkkür edib, elmi fəaliyyətlərində yeni-yeni uğurlar arzulayıb, onları xüsusi sertifikatlarla təltif edib.
Beynəlxalq Elmi-Praktik Konfransın plenar iclasında İspaniyanın Qranada Universitetinin Genetika kafedrasının professoru Federiko Zurita Martinez “CRISPR-Cas9. İnsan xəstəliklərinin müalicəsi üçün molekulyar qayçı”, Türkiyənin Atatürk Universitetinin dosenti İlhan Volkan Öner “Tullantıların alternativ enerjinin alınmasında tətbiqi”, Bolu Abant İzzet Baysal Universitetinin professoru Himmet Karadal “Türk dünyasında innovasiyaların və sahibkarlığın inkişafı”, ATU-nun Ümumi və tətbiqi fizika kafedrasının müdiri professor Məntiq Cəfərov “Elm, texnologiya və innovasiya üçbucağı davamlı inkişafın hərəkətverici qüvvəsi kimi”, ATU-nun doktorantı Kamran Qasımov isə “Müasir dünyada süni intellektin rolu” başlıqlı məruzələrlə çıxış ediblər.
