Bakı-Gəncə marşrutu üzrə hərəkət edən “27-TA-092” dövlət qeydiyyat nişanlı sərnişin avtobusunda kondisionerin işləməməsi sərnişinlərin ciddi narazılığına səbəb olub.
Gencexeber.az-a şikayət ünvanlayan L.Məmmədova iddia edib ki, Gəncə Beynəlxalq Avtovağzalının parkı yeni avtobuslarla təchiz olunsa da, xidmət keyfiyyəti hələ də qənaətbəxş deyil. Bildirilib ki, qeyd olunan marşrut üzrə hərəkət edən avtobusda kondisioner ya ümumiyyətlə işə salınmayıb, ya da sürücü tərəfindən fasilələrlə qoşulub.
“Salonun havasız və bürkülü olması səbəbilə bir çox insan özünü pis hiss edib. Sürücü yalnız narazılıqlar səsləndirildikdən sonra kondisioneri cəmi 10 dəqiqəlik aktiv edib, ardınca onu yenidən söndürərək havalandırma sisteminə keçib” - şikayətçi qeyd edib.
Əlavə olunub ki, Ucar rayonu ərazisində avtobus texniki nasazlıq səbəbilə yolda qalıb. Sürücünün müdaxiləsindən sonra nasazlıq aradan qaldırılsa da, sərnişinlər beş saata yaxın müddətdə stres və narahatlıq içində Gəncəyə səyahət etdiklərini bildiriblər.
Vətəndaşlar Gəncə-Bakı reyslərinin həm texniki, həm də xidmət baxımından yenidən qiymətləndirilməsini xahiş edir, məsul qurumlardan bu hallara son qoyulmasını gözləyirlər.
