Gəncədə avtoxuliqanlıq edən şəxslər saxlanılıblar. Bu haqda 9 yanvar tarixində Avtosfer-ə istinadən məlumat veririk.
Şəhər Baş Polis İdarəsinin Dövlət Yol Polisi Şöbəsinin (ŞBPİ DYPŞ) əməkdaşları “Chevrolet” markalı avtomobili idarə edən Kamil Süleymanovu saxlayıblar. O, yollarda intizamsızlıq edərək yol hərəkəti qaydalarını kobud şəkildə pozub, avtoxuliqanlıq edib və bununla da ictimai asayişi nümayişkaranə şəkildə pozaraq vətəndaşların narazılığına səbəb olub. Həmin şəxs barəsində inzibati protokol tərtib olunub və baxılması üçün aidiyyəti üzrə məhkəməyə göndərilib.
Bundan başqa, bir qrup gəncin özlərinə məxsus avtomobillərlə dövlət qeydiyyat nişanı olmadan, qanunla qadağan edilmiş konstruksiya dəyişikliyi edərək digər hərəkət iştirakçılarına təhlükə yaratdıqları məlum olub. Həmin sürücülər saxlanılaraq avtomobilləri duracağa yerləşdirilib, nəqliyyat vasitələrindəki qanunsuz dəyişikliklər aradan qaldırılıb və barələrində qanuni tədbir görülüb. Saxlanılan şəxslərdən bir neçəsi daha əvvəl də analoji inzibati xəta törədərək məsuliyyətə cəlb olunub.
