Gəncədə “Yeniyetmə və gəncləri dini radikalizm təhlükəsindən qoruyaq” mövzusunda maarifləndirmə tədbiri baş tutub. Bu haqda 22 may tarixində İcra Hakimiyyətinə istinadən xəbər veririk.
Tədbir Dini Qurumlarla İş üzrə Dövlət Komitəsinin Gəncə bölgəsi üzrə şöbəsinin təşkilatçılığı ilə Azərbaycan Texnologiya Universitetində təşkil olunub. Burada DQİDK-nın Gəncə bölgəsi üzrə şöbəsinin müdiri Həsən Məmmədov, şöbənin müdir müavini Elmar Fətəliyev, ATU-nun prorektoru Şahmar Həsənov, müəllim və tələbələr iştirak ediblər.
Çıxışlarda dini radikalizmin fəsadları barədə fikirlər səsləndirilib, belə hallara qarşı mübarizədə hər kəsin üzərinə böyük məsuliyyət düşdüyü vurğulanıb. Həmçinin tələbələrin milli-mənəvi dəyərlər və azərbaycançılıq ruhunda tərbiyə edilmələri, vətənpərvər gənclər kimi formalaşmaları, zərərli vərdişlərdən və radikal dini təsirlərdən qorunmalarının vacibliyi qeyd edilib.
Sonda DQİDK-nın sifarişi ilə çəkilmiş “Şəhadət” sənədli filmi nümayiş olunub.
