Gəncədə Anım Günü ilə bağlı tədbir keçirilib. Bu haqda 26 sentyabr tarixində ATU-ya istinadən məlumat veririk.
Tədbir Azərbaycan Texnologiya Universitetində təşkil olunub. Burada Vətən müharibəsi şəhidlərinin ailə üzvləri və qazilər iştirak ediblər. Tədbirdən öncə universitetin həyətində ATU-nun şəhid məzun və tələbələrinin xatirəsinə ucaldılmış abidə ziyarət edilib, önünə gül dəstələri düzülüb.
Sonra fəxri qonaqlar və ATU kollektivi üçün “44 Gün, 44 An” adlı sənədli film nümayiş olunub. Universitetin rektoru vəzifəsini müvəqqəti icra edən Yaşar Ömərov Azərbaycan Ordusunun qüdrətindən, mübariz əsgər və zabitlərdən, o cümlədən ATU-nun Vətən müharibəsinə qoşulan şəhid məzun və tələbələrindən danışıb.
YAP Gəncə Şəhər Təşkilatının sədri Bayram Aslanov Azərbaycan gəncliyinin vətənpərvər ruhda yetişməsindən, İkinci Qarabağ müharibəsində şəhid və qazilərin misilsiz qəhrəmanlıqlarından bəhs edib. Gəncə şəhidi Nurhan Abbasovun anası Səidə Abbasova bütün şəhid anaları timsalında çıxış edərək öz hisslərini bölüşüb.
Tədbirdə, həmçinin ATU-nun magistratura pilləsinin birinci kurs tələbəsi, Vətən müharibəsi şəhidi Anar Qarayevin qardaşı Allahverdi Qarayev, şəhid Mərhab Əliyevin qardaşı, Vətən müharibəsi iştirakçısı Şöhrət Əliyev, universitetin qazi tələbəsi Gündüz Abdullayev çıxış edərək, 44 günün həm ağrılı, həm də qürurlu anlarından danışıblar.
ATU-nun qazi məzununun valideyni, eyni zamanda Maşın mühəndisliyi və logistika kafedrasının müdiri Şakir Əliyev və universitetin əməkdaşı, I Qarabağ müharibəsi qazisi İsfəndiyar Hacıyev həmin illəri bir daha xatırlayaraq bütün şəhidlərə Allahdan rəhmət diləyiblər.
