Azərbaycan Milli Elmlər Akademiyasının Gəncə bölməsində 28 May - Müstəqillik Gününə həsr olunan dəyirmi masa baş tutub. Bu haqda 29 may tarixində Kəpəz televiziyasına istinadən xəbər veririk.
Dəyirmi masada iştirakçılar "Xalq Cümhuriyyətimiz Azərbaycanın tarixi sərvətidir" mövzusunda çıxış ediblər. Onlar hökumətin üç ay ərzində Gəncədəki fəaliyyətinin tariximizin və dövlətçiliyimizin şanlı səhifələrinə yazıldığını vurğulayıblar. Qeyd edilib ki, Cümhuriyyət tarixinin ən məhsuldar dövrü şəhərimizdə yaşanıb.
Tədbirdə bildirilib ki, Gəncədə xalqın taleyi ilə bağlı yüzdən artıq qanun və qərar qəbul edilib, Azərbaycan dili dövlət dili elan olunub və ilk dəfə al qırmızı ay-ulduzlu bayrağımız burada ucaldılıb. Azərbaycan Milli Ordusunun təşkili sahəsində ilk addımlar atılıb. Daha sonra “Azərbaycan Xalq Cümhuriyyəti dövründə maarifçilik”, “Gəncənin cümhuriyyət şairləri”, “İrəvanın ermənilərə verilməsi:cümhuriyyət liderlərinin səhvi, yoxsa məcburiyyət” və başqa mövzularda müzakirələr aparılıb, məruzələr dinlənilib.
