Gəncədə narkomaniya ilə bağlı tədbir baş tutub. Bu haqda 25 may tarixində ADAU-ya istinadən məlumat veririk.
“Narkomaniyaya “Yox” deyək!” adlı konfrans Şəhər Ağsaqqallar Şurasının, İcra Hakimiyyətinin və Şəhər Baş Polis İdarəsinin birgə təşkilatçılığı ilə keçirilib. Tədbir Azərbaycan Dövlət Aqrar Universitetində təşkil olunub.
Burada universitetin rektoru Zəfər Qurbanov narkomaniyanın fəsadlarından bəhs edib. O bildirib ki, narkomaniyanın gənclər arasında yayılmasının qarşısını almaq üçün bütün təhsil müəssisələrində maarifləndirmə işləri daha da gücləndirilməlidir.
Sonra Ağsaqqallar Şurasının İdarə Heyətinin üzvü, ehtiyatda olan polis polkovnik-leytenantı Ramiz Sadıxov, ADAU-nun Əczaçılıq kafedrasının müəllimi Samirə Quliyeva, baş müəllim Sakit Atakişiyev, polis kapitanı Əmrah Cəfərov, tələbə Həmid Səfərov və başqaları narkotik maddələrin istifadəsi nəticəsində baş verə biləcək fəsadlardan, narkoloji xəstələrin müayinə və müalicəsindən, həmçinin onunla mübarizədən və aradan qaldırılması tədbirlərindən söz açıblar.
