Gəncədə universitetlərin birində təhsil alan tələbələrə təqaüd veriləcək. Bu haqda 10 may tarixində ADAU-ya istinadən xəbər veririk.
Azərbaycan Respublikasının kənd təsərrüfatı, elm və təhsil nazirlərinin, “Aqrar Məşvərət Şurası” İctimai Birliyinə üzv şirkətlərin rəhbərlərinin, o cümlədən aidiyyəti qurumların nümayəndələrinin iştirakı ilə Şuranın 12-ci görüşü keçirilib. Burada “Aqrar sahə üzrə təhsil sisteminin inkişaf etdirilməsi” mövzusunda müxtəlif təqdimatlar edilib və ətraflı müzakirələr aparılıb.
Memorandum çərçivəsində “Aqrar Məşvərət Şurası” İctimai Birliyi tərəfindən ADAU-nun bakalavriat səviyyəsinin “Aqronomluq”, ”Baytarlıq təbabəti”, “Zoomühəndislik” və “Aqromühəndislik” ixtisasları üzrə yüksək təhsil göstəricilərinə görə uğur qazanan bir qrup, əyani formada təhsil alan II və III kurs tələbələri təqaüd alacaqlar. Onlara “Azərbaycanın gənc aqro liderləri” təqaüdünün verilməsi nəzərdə tutulub.
Tədbirin yekununda “Aqrar Məşvərət Şurası” İctimai Birliyi ilə Azərbaycan Dövlət Aqrar Universiteti Publik hüquqi şəxs arasında Əməkdaşlıq Memorandumu imzalanıb. Burada məqsəd tələbələrin aqrar təhsilə marağını artırmaq, tədris fəaliyyətlərini fəallaşdırmaq, tədrisdə əldə etdikləri nailiyyətlərini qiymətləndirməkdir. Həmçinin onların gələcəkdə yüksək ixtisaslı mütəxəssis kimi hazırlanmasına dəstək olmaqdır.
