Gəncədə yerləşən Azərbaycan Dövlət Aqrar Universitetinin əməkdaşı İsveçin Kral Texnologiya Universitetində təlimdə iştirak edib. Bu haqda 11 iyun tarixində ADAU-ya istinadən xəbər veririk.
Mingəçevir Dövlət Universitetinin koordinatoru olduğu, Avropa Komissiyasının maliyyə dəstəyi ilə həyata keçirilən “Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) adlı Erasmus+ layihəsinin ali təhsil müəssisələrində institusional səviyyədə davamlı sahibkarlıq ekosisteminin gücləndirilməsi məqsədi daşıyan 4-cü iş paketinin icrasına başlanılıb.
4-cü fəaliyyət planı çərçivəsində tərəfdaş universitetlərin sahibkarlıq üzrə professor-müəllim heyəti üçün “Ali təhsilin inkişaf etdirilməsi” adlı təlim proqramı İsveçin Kral Texnologiya Universitetində öz işinə başlayıb. İşgüzar səfərdə layihə konsorsiumunun üzvü olan 11 Azərbaycan ali təhsil müəssisəsinin nümayəndələri iştirak ediblər. Təlimdə ADAU-nun əməkdaşı Rahil Muradov da iştirak edib. 5 günlük təlim proqramı çərçivəsində iştirakçılar təşkilati inkişafın gücləndirilməsində həm təşkilati, həm də fənn səviyyəsində təhsilin keyfiyyətini artırılması strategiyaları, təhsil keyfiyyətini yüksəltmək üçün səmərəli keyfiyyət təminatı proseslərinin həyata keçirilməsi, akademik heyətin təcrübələrini və tədris bacarıqlarını inkişaf etdirmək üçün təlim və dəstək xidmətlərinin vacibliyi, davamlı inkişaf məqsədlərinin və sahibkarlıq bacarıqlarının təhsilə inteqrasiyası, problem əsaslı öyrənmə imkanlarını artırmaq və təhsil xidmətlərini daha əlçatan etmək məqsədilə rəqəmsal texnologiyalardan istifadə, tələbələrin peşə bacarıqlarının inkişaf etdirilməsi üçün səmərəli və effektiv tədris təcrübələrindən istifadə etməklə təlim nəticələrinin təkmilləşdirilməsi metodlarının araşdırılması kimi mühüm mövzularda təqdimatlarla tanış olmaqla müzakirələr aparılıb və komanda işləri təqdim edilib.
Proqrama uyğun olaraq, təlimlərin yekununda iştirakçılar KTH Universiteti tərəfindən sertifikatlarla təltif olunublar.
