Gəncədə Dövlət Məşğulluq Agentliyi ilə Azərbaycan Dövlət Aqrar Universiteti arasında əməkdaşlıq memorandumu imzalanıb. Bu haqda 23 may tarixində ADAU-ya istinadən xəbər veririk.
Sənədin imzalanması tədbirində Agentliyin İdarə Heyətinin sədri Mustafa Abbasbəyli Agentliyin fəaliyyəti, qarşıya qoyulan hədəflər və əldə olunan nəticələr haqqında məlumat verib. Dövlət Aqrar Universitetinin rektoru Zəfər Qurbanov Universitetin məzunlarının işlə təmin olunmasının əsas hədəflərdən biri olduğunu, onların gələcək karyera inkişafının daim diqqətdə saxlandığını qeyd edib. Tərəflər arasında əməkdaşlıq memorandumu imzalanıb.
Daha sonra tədbirdə “Məzunların məşğulluq reytinqi” platformasının təqdimatı olub. Platforma 3 bölmədən ibarətdir. Burada hər bir universitetin məzunlarını daha çox işlə təmin edən top 10 işəgötürənin adı, iqtisadi fəaliyyət növləri, məzunların işlə təminatı üzrə müddət aralıqları, ixtisasları üzrə çalışmaları, cins, sektor, sahə, əməkhaqqı aralıqları və digər parametrlər, universitetlərin, ixtisasların reytinqləri əks olunur.
