Gəncədə məhəllələr abadlaşdırılır. Bu haqda 26 dekabr tarixində İcra Hakimiyyətinə istinadən məlumat veririk.
“Abad məhəllə" layihəsi çərçivəsində növbəti işlər həyata keçirilib. Abadlıq işləri Heydər Əliyev və Nizami Gəncəvi prospektlərinin kəsişməsində yerləşən 81, 151 nömrəli çoxmənzilli binaların həyətlərində aparılıb. Mənzil Kommunal Təsərrüfat İstehsalat Birliyinin ağır texnikaları vasitəsilə ərazidə səliqə-sahman yaradılıb, asfalt örtüyü salınıb.
Həmçinin burada yeni səki daşları quraşdırılacaq, ərazi yaşıllaşdırılaraq, dekorativ ağaclar və gül kolları əkiləcək. Abadlaşdırılan məhəllələrdə söhbətgahlar, oturacaqlar, böyüklər üçün idman qurğuları yerləşdiriləcək, uşaq meydançaları düzəldiləcək, məişət tullantılarının atılması üçün yeni konteynerlər düzüləcək.
Xatırladaq ki, bundan öncə işlər Gülüstan yaşayış massivində və 1-ci mikrorayonda yerləşən binaların həyətlərində aparılıb.
