Gəncədə bir neçə məhəllə abadlaşdırılır. Bu haqda 6 yanvar tarixində Mənzil Kommunal Təsərrüfatı İstehsalat Birliyinə istinadən məlumat veririk.
“Abad məhəllə”lərin salınması işləri davam etdirilir. İşlər hazırda şəhərin Gülüstan yaşayış massivində və 1-ci mikrorayon ərazisində aparılır. Burada yaşayış binalarının həyətlərində yöndəmsiz tikililər sökülərək ərazidə səliqə-səhman yaradılır, yeni bordürlər və səki daşları düzülür, asfalt örtüyü çəkilir, yaşıllıq massivi salınır.
Küçə işıqlandırılması şöbəsi tərəfindən hazırda yeni salınan “Abad məhəllə”lərdə gecə işıqlandırılması sistemi qurulur. Gülüstan qəsəbəsində yerləşən məhəllədə artıq 22 ədəd dayaq basdırılıb və 20 ədəd plafon qoyulub, hazırda isə elektrik xətləri çəkilir. Ümumilikdə isə sözügedən ərazidə 50-yə yaxın dayağın basdırılması nəzərdə tutulub.
“Abad məhəllə”nin 1-ci mikrorayon ərazisində isə 22 ədəd dayağın basdırılması məqsədilə quyular qazılıb, digər işlərin aparılmasına hazırlıq görülür. Bundan başqa, sakinlərin rahat və təhlükəsiz istirahətinin təmin edilməsi məqsədilə söhbətgahlar, oturacaqlar, idman qurğuları, uşaq və əyləncə meydançaları salınır, müasir işıqlandırma sistemi qurulur, məişət tullantılarının atılması üçün yeni konteynerlər yerləşdirilir.
