Gəncədə ərazilərin birində sakinlər təhlükə ilə üz-üzədirlər. Bu haqda Gencexeber.az-a 26 iyun tarixində məlumat daxil olub.
Söhbət şəhərin Səfəvilər küçəsi,106 ünvanından gedir. Burada evlərin birinə bitişik və setka ilə əhatə olunmuş transformator mövcuddur. Ərazidə yaşayan sakinlərin sözlərinə görə, dəfələrlə transformator partlayaraq ətrafa qığılcım yayıb. Təhlükə saçan transformator onların narahatlığına səbəb olub.
Bu hal küçədə oynayan uşaqlar və hər kəs üçün təhlükə mənbəyinə çevrilib. “Transformator adi dəmir setka ilə hasara alınıb. Ora tez-tez pişiklər düşüb yanır, uşaqlar küçədə topla oynayanda topları setkadan icəri düşür, onlar da ağacla, əllərı, ayaqları ilə çalışırlar topu ordan çixartsınlar. Dəfələrlə olub ki transformator partlayıb, qığılcımı bizim həyətə və ətrafa tökülüb. Bir neçə dəfə aidiyyəti qurumlara müraciət etmişik, yalnız nəticəsi olmayıb. Hətta bizdən buna görə rüsum ödəməyimizi istəyiblər. Transformator dövlət balansındadır. Nəyə görə pul ödəməliyik?”, – deyə sakinlər bildiriblər. Onlar təhlükənin aradan qaldırılmasını, transformatorun yerinin dəyişdirilməsini istəyirlər.
