Xəbər verdiyimiz kimi, Samux Rayon Tatlı kənd ümumi orta məktəbində 4 aydır istilik sistemi işləmir.
Gəncə-Daşkəsən Regional Təhsil İdarəsindən Gencexeber.az-ın sorğusuna cavab olaraq bildirilib ki, təhsil müəssisələrində təlim-tədris prosesinin fasiləsizliyinin təmin edilməsi, eləcə də uşaqların sağlam və təhlükəsiz mühitdə təhsil alması prioritet istiqamətlərdəndir.
“Bu baxımdan, payız-qış mövsümündə təhsil müəssisələrinin istiliklə təchizatının təmin edilməsi xüsusi əhəmiyyət kəsb edir. İstilik təminatının plana və qanunvericiliyə uyğun müddətdə həyata keçirilməsi, uşaqların istiliklə təchiz edilmiş təhsil müəssisələrində təlim-tədrisə cəlb olunmaları və tədrisin fasiləsizliyinin təmin edilməsi məqsədi ilə aidiyyəti qurumlarla birgə hazırlıq işləri həyata keçirilib. Hazırda gündəlik əsasda yarana biləcək istilik təminatına dair məsələlərlə bağlı digər aidiyyəti qurumlarla birlikdə operativ işçi qrupları yaradılıb. Daxil olan müraciətlər qeydiyyata alınır, təhlillər aparılır və qısa zamanda həlli istiqamətində müvafiq addımlar atılır”, - açıqlamada qeyd olunub.
Bildirilib ki, Samux rayonu Tatlı kənd ümumi orta məktəbinin istilik təminatı kombi sistemi vasitəsilə həyata keçirilir:
“03 fevral 2025-cü il tarixdə təhsil müəssisəsinin istiliklə təminatında problem olmayıb. 04 fevral 2025-ci il tarixində səhər saatlarında məktəbin istilik sisteminin sayğacında texniki problem yaranıb və qısa müddətdə aradan qaldırılıb.
Bildiririk ki, ölkə ərazisində fəaliyyət göstərən ümumi və məktəbəqədər təhsil müəssisələrinin mərkəzləşdirilmiş qaydada və müxtəlif vasitələrlə (odun, dizel, elektrik radiatoru) istilik mövsümünə hazır vəziyyətə gətirilməsi prosesi təmin olunur”.
