Yevlax rayonunda sərnişin avtobusunun aşması nəticəsində xəsarət alanların son durumu məlum olub.
Gencexeber.az-ın sorğusuna cavab olaraq TƏBİB-dən bildirilib ki, qəza zamanı xəsarət alanlara ilkin tibbi xidmət göstərilib.
“Aprelin 16-da saat 06:00 radələrində yol-nəqliyyat hadisəsi nəticəsində xəsarət alan 8 nəfər (5 qadın, 3 kişi) Şəki Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub. Hər bir şəxsə ilkin tibbi yardım göstərilib.
Vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar”, - məlumatda qeyd olunub.
10:20
Yevlaxda sərnişin avtobusu aşıb.
Unikal.аz xəbər verir ki, hadisə Yevlax rayonunun Xanabad kəndi istiqamətindən keçən magistral yolda baş verib. Zaqatala-Bakı marşrutu üzrə hərəkət edən sərnişin avtobusu idarəetmədən çıxaraq yol kənarına aşıb.
Nəticədə 8 nəfər xəsarət alıb. Onlar 1988-ci il təvəllüdlü Zaqatala rayonu Bəhmətli kənd sakini Şirinbəyova Rəqsanə Şahmalı qızı, 1960-cı il təvəllüdlü Zaqatala rayonu Yeni Suvagil kənd sakini Məmmədova Leysanat İbad qızı, Zaqatala rayonu Əliabad qəsəbə sakini Adilova Həlimə Ağabala qızı, 1967-ci il təvəllüdlü Zaqatala rayonu sakin Əliyev Qüdrət Abdulla oğlu, 2004-cü il təvəllüdlü Zaqatala rayonu Aşağı Tala kənd sakini Ramazanzadə Aysel Adil qızı, 1969-cu il təvəllüdlü Zaqatala rayonu Yeni Suvagil kənd sakini Babayeva Kifayət Hüseyn qızı, 1993-cü il təvəllüdlü Zaqatala rayonu Yeni Suvagil kənd sakini Babayev İlkin Yusif oğlu və 1983-cü il təvəllüdlü Zaqatala rayonu Yeni Suvagil kənd sakini Məmmədova Aygün Osman qızıdır.
Hadisə yerinə 5 təcili tibbi yardım briqadası və FHN əməkdaşları cəlb olunub.
Faktla bağlı araşdırma başlanıb.
