Gəncədə qripə yoluxanların sayı gündəlik müraciətləri dəfələrlə üstələyib. Bu haqda 7 yanvar tarixində Kəpəz televiziyasına istinadən məlumat veririk.
Qrip diaqnozu ilə Gəncə şəhər Birləşmiş Xəstəxanasının Yoluxucu xəstəliklər şöbəsinə müraciət edənlərin sayında artım var. Sakinlər yüksək hərarət, burun axması, boğaz, qulaq, əzələ-sümük ağrıları, şiddətli öskürək, qulaqlarda uğultu, tutulma, baş ağrıları və s. əlamətlərlə həkimlərə müraciət edirlər.
Həkim Əli Quliyev bildirir ki, bu qrip infeksiyasıdır. İnfeksiya daha çox hava damcı yolu ilə yayıldığından həkimlər əhalinin sıx olan yerlərində, kütləvilik olan məkanlarda qorunma tədbirlərinə laqeyd olmamağı məsləhət görürlər.
Ölüm halları müşahidə olunmasa da, bu xəstəlik insanlarda orta ağır və ağır formada keçir. Az hallarda isə yüngül formada rast gəlinir. Respirator virus infeksiyası daha çox uşaqlar arasında geniş yayılıb.
Xatırladaq ki, 15 dekabr tarixindən qrip əleyhinə peyvəndin vurulmasına başlanılıb. Vaksin 6 yaşdan yuxarı vətəndaşlara vurulur. Ümumilikdə 355 nəfər Gəncə sakininə peyvənd olunub.
