Gəncə şəhərində yerləşən parkların birində gecələyən 67 yaşlı Xaliq Mirzəyevlə bağlı sevindirici xəbər var.
Gencexeber.az-ın məlumatına görə, mərhəmətli Gəncə sakini yaşlı kişini öz evinə aparıb. Redaksiyamıza bildirilib ki, X.Mirzəyevə lazımi qulluq göstərilir, səhhəti nəzarət altındadır.
Hazırda onun köhnəlmiş sənədlərinin yenilənməsi üçün müvafiq prosedurlar həyata keçirilir. Bu işlər başa çatdıqdan sonra Xaliq Mirzəyevin qocalar evinə yerləşdirilməsi təmin ediləcək.
Xatırladaq ki, Xaliq Mirzəyev Mehralı oğlu bir həftədən çoxdur ki, 3-cü mikrorayon ərazisində – Elbrus Allahverdiyev və Şah İsmayıl Xətai prospektlərinin kəsişməsində yerləşən parkda skamyanın üstündə gecələyirdi.
Qeyd edək ki, X.Mirzəyev daha əvvəl Gencexeber.az-a açıqlamasında 2002-ci ildə dələduzluq nəticəsində evini itirdiyini, mülksüz qaldığını və 23 ildir küçələrdə yaşadığını deyib. O, əvvəllər şəhər ərazisində daxmada qalsa da, sonradan oradan çıxarılıb. Qocalar evinə müraciət etsə də, yaşı 70-dən az olduğu üçün qəbul edilmədiyini bildirib.
