Gəncə Memorial Kompleksinin ərazisində ziyarətçilərin davranışı ilə bağlı narazılıqlar yaranıb.
Gencexeber.az məlumat verir ki, bəzi sakinlər kompleksin binası üzərinə çıxırlar. Məlum olduğu kimi, şəhərin yeni memarlıq nümunələrindən biri hesab olunan tikili yerdən qalxan aypara formasında layihələndirilib. Üzəri isə yaşıl ot örtüyü ilə bəzədilib.
Bildirilib ki, kompleksin qarşısında "Çıxmaq qadağandır" xəbərdarlıq lövhəsi yerləşdirilsə də, bəzi valideynlər uşaqları ilə birlikdə tikilinin üzərinə çıxırlar. Sakinlərin sözlərinə görə, bu hal həm yaşıllıq örtüyə ziyan vurur, həm də memarlıq kompozisiyasının estetik görünüşünü korlayır.
Şikayətçilər onu da qeyd edirlər ki, bəzi şəxslər yaşıllıq zolağında əyləşərək məişət tullantıları ilə ərazini çirkləndirirlər: "Hətta binanın üzərinə çıxıb, tum çırtlayırlar".
Sakinlər ziyarətçiləri ictimai məkanlara və şəhərin yeni infrastruktur obyektlərinə daha həssas yanaşmağa, həmçinin aidiyyəti qurumları əraziyə nəzarətin gücləndirilməsinə çağırırlar.
