Gəncədə intihar məqsədilə üzərinə yandırıcı maye tökən şəxs 4 gün sonra xəstəxanada ölüb. Bu haqda 29 may tarixində Apa-ya istinadən xəbər veririk.
Narkotiklərin qanunsuz dövriyyəsinə görə dəfələrlə məhkum olunmuş 25 yaşlı Naməddin Əliyev cinayət məsuliyyətindən yayınmaq üçün intihara cəhd edib.
Törətdiyi əməllərə görə elektron qolbaq daşıyan N. Əliyev 21 may tarixindən şəhər ərazisində narkotik vasitənin təsiri altında ailə üzvlərinin şikayətlərini geri götürmələri tələbi ilə üzərinə yandırıcı maye töküb, onlara qarşı iddialar səsləndirib. Ətrafda olan şəxslərin köməyi ilə intihar cəhdinin qarşısı alınıb və o, xəstəxanaya yerləşdirilib.
Göstərilən tibbi müdaxilələrə baxmayaraq, 25 may tarixində xəstəxanada ölüb. Məlumatı DİN-in Mətbuat Xidmətinin regional qrupundan təsdiqləyiblər. Hazırda aidiyyəti üzrə hadisənin təfərrüatları araşdırılır.
