Gəncədə qarlı hava zamanı xəstəxanalara müraciətlərin sayı artıb. Bu haqda 12 yanvar tarixində Kəpəz televiziyasına istinadən məlumat veririk.
Gəncə şəhər Birləşmiş Xəstəxanasından bildirilib ki, havaların qarlı-şaxtalı keçdiyi bu günlərdə travmatoloji xəsarətlərlə müraciətlərin sayı artıb. Xüsusən də yaşlı insanların üstünlük təşkil etdiyi travmalar bilək və topuq nahiyələrindədir. Gün ərzində travmatoloji şöbəyə 20-yə yaxın bu tip müraciət daxil olub.
Hava şəraitinin kəskin dəyişməsi ilə əlaqədar Gəncə Şəhər Təcili və Təxirəsalınmaz Tibbi Yardım Stansiyasına daxil olan zənglərin sayı artıb. Sürüşkən yollarda baş verən qəzalar, travmatoloji xəsarətlər, yuxarı tənəffüs yolları infeksiyaları ilə bağlı 103-ə müraciət edənlər çoxluq təşkil edirlər.
Son günlər təcili yardıma gündəlik müraciətlərin sayı 150-dən 300-ə qədər artıb. Əsasən də respirator virus səbəbindən halı pisləşənlər üstünlük təşkil edirlər.
