Samuxda tanışını öldürməkdə təqsirləndirilən Eltac Çələbiyev barəsindəki hökmdən apellyasiya şikayəti verilib.
Pravda.аz-ın əldə etdiyi məlumata görə, Bakı Apellyasiya Məhkəməsində keçiriləcək ilkin hazırlıq iclası noyabrın 5-nə təyin edilib. Şikayət hakim Müşfiq Məmmədovun sədrliyi ilə araşdırılacaq.
Xatırladaq ki, Gəncə Ağır Cinayətlər Məhkəməsinin hökmü ilə o, 17 il müddətinə azadlıqdan məhrum edilib.
Qeyd edək ki, 2001-ci il təvəllüdlü Çələbiyev Eltac Xuday oğlu Samux rayonu Burunqovaq kəndi ərazisində şəxsi münasibətlər zəminində 1986-cı il təvəllüdlü İbrahimov Muraz Rəhim oğlunu öldürməkdə təqsirləndirilir. Ona qarşı Cinayət Məcəlləsinin 120.2.4-cü maddəsi ilə ittiham irəli sürülüb.
İttihama görə, Eltac Çələbiyev hadisə günü kənddə iştirak etdiyi toy məclisində spirtli içki qəbul edib. O, mağarın qarşısında dayanarkən həmin vaxt həmkəndlisi Muraz İbrahimovun arvadı ilə birlikdə toy məclisindən çıxıb getdiklərini görüb. Sonra təqsirləndirilən şəxs onların arxasınca gedib mağardan 60 metr məsafədə küçədə üzərində gəzdirdiyi bıçaqla onu hədələyib nalayiq söyüşlər söyüb. Nəticədə Eltac M.İbrahimovu arvadının gözü qarşısında bıçaqlayaraq öldürüb.
