Gəncə sakini tiktoker qadının gecə saatlarında ictimai asayişi kobud şəkildə pozduğunu iddia edir.
Gencexeber.az-a məsələ ilə bağlı müraciət edən Adil İsgəndərov küçəsinin sakini bildirib ki, iyunun 3-ü gecə saat 02:00 radələrində yaşadığı evdə yüksək səslər səbəbindən oyanıb. Onun iddiasına görə, qadın rəfiqəsi ilə birlikdə küçədə uca səslə danışaraq təhqiramiz ifadələr işlədib, avtomobilin kolonkalarından isə yüksək səslə musiqi səsləndirilib.
Vətəndaşın sözlərinə görə, o, həmin şəxsin Gəncədə yaşayan tanınmış tiktokerə bənzədiyini düşünərək sosial şəbəkədə açdığı canlı yayıma qoşulub və şəxsiyyətindən əmin olduğunu bildirib.
Sakin redaksiyamıza təqdim etdiyi görüntüləri sübut kimi təqdim edərək iddia edib ki, qadın və onunla birlikdə olan şəxs qeyd olunan hərəkətlərə yol verib, gecə saatlarında ictimai asayişi nümayişkaranə şəkildə pozublar. O, həmçinin digər şəxsin içkili vəziyyətdə olduğunu və yetkinlik yaşına çatmadığını ehtimal etdiyini bildirib.
"Bunlar adam saymırlar. Əsasda o tiktoker. Əllərindən çölə çıxa bilmirik, indi də evdə otura bilmirik", – şikayətçi bildirib.
Qeyd edək ki, sözügedən tiktoker bir müddət əvvəl idarə etdiyi "Chevrolet" markalı avtomobili yolun hərəkət hissəsində, işıqforun qırmızı işığında saxlayaraq nəqliyyat vasitəsindən enib rəqs etdiyi görüntülərlə sosial şəbəkələrdə gündəm olmuşdu.
