Tanınmış ortoped-travmatoloq, tibb üzrə fəlsəfə doktoru Elşən Məhərrəmov vəfat edib.
Gencexeber.az xəbər verir ki, 59 yaşlı Elşən Məhərrəmov Bakıda torpağa tapşırılıb. O, paytaxtda yaşasa da, doğma Gəncə şəhərindəki xəstəxanalarda da fəaliyyət göstərirdi.
Qeyd edək ki, Elşən Məhərrəmov 1966-cı ildə Bakıda ziyalı ailəsində dünyaya gəlib. 1983-cü ildə 23 nömrəli orta məktəbi bitirdikdən sonra Nəriman Nərimanov adına Azərbaycan Tibb İnstitutuna daxil olub və təhsilini uğurla başa vurub. Hələ ali məktəbdə oxuduğu illərdə Elmi-Tədqiqat Travmatologiya və Ortopediya İnstitutunda tibb qardaşı kimi əmək fəaliyyətinə başlayıb.
O, uzun illər Uşaq Ortopediya və Travmatologiya Bölməsinin rəhbəri vəzifəsində çalışıb, eyni zamanda tibb üzrə fəlsəfə doktoru elmi dərəcəsinə layiq görülüb. İşlədiyi müddətdə Elşən Məhərrəmov həm peşəkarlığı, həm də xəstələrə qayğısı ilə seçilərək həmkarlarının və pasiyentlərin dərin hörmətini qazanıb.
O, 50-dən çox elmi məqalənin, 3 səmərələşdirici təklifin və 3 patentin müəllifi idi.
Elşən Məhərrəmov 1929-cu ildə Gəncə şəhərində anadan olan görkəmli tibb xadimi, professor Kamal Məhərrəmovun oğludur. Atası Kamal Məhərrəmov ortopediya və travmatologiya sahəsində tanınmış alim, tibb elmləri doktoru, professor, 140-dan çox elmi işin və 3 monoqrafiyanın müəllifi olub. O, uzun illər tibb elminin inkişafına mühüm töhfələr verib.
Elşən Məhərrəmovun vəfatı həm tibbi ictimaiyyət, həm də Gəncə və Bakıdakı həmkarları arasında dərin kədər doğurub. Allah rəhmət eləsin.
