Təsərrüfat müdiri, eləcə də təsərrüfat işləri üzrə direktor müavini, psixoloq və gənclərin çağırışaqədərki hazırlığı rəhbəri vəzifələrinə işə qəbul üzrə müsabiqənin test imtahanı mərhələsi keçiriləcək.
Qazax-Tovuz Regional Təhsil İdarəsi xəbər verir ki, vakant yerlər üzrə imtahan avqustun 30-da olacaq. Burada namizədlərə “Təhsil sahəsinə aid olan qulluqçu vəzifələrinin Vahid Tarif-İxtisas Sorğu Kitabçası”na müvafiq olaraq qanunvericilik üzrə 20 sual, İKT (informasiya və kommunikasiya texnologiyaları) bacarıqlarının yoxlanılması və məntiq üzrə hər birinə aid 10 sual olmaqla, ümumilikdə 40 test tapşırığı təqdim ediləcək.
İmtahan saat 15:30-da Şəmkir şəhəri F.Salmanov adına tam orta məktəbdə (ünvan: Şəmkir şəhəri Şıxəli Qurbanov küçəsi, 1) keçiriləcək.
