Yeni yayılmağa başlayan xəstəliklə bağlı Azərbaycana tester və dərmanlar gətirilib. Bu haqda Azərtac-a istinadən xəbər veririk.
Hazırda dünyanın bir sıra ölkələri, xüsusilə də Afrikada Meymunçiçəyi virusu yenidən yayılmağa başlayıb. Bununla bağlı ölkəmizə xəstəliyin müayinəsi üçün testlər və ona qarşı lazımi dərman preparatları gətirilib.
Səhiyyə Nazirliyinin mütəxəssis-eksperti, infeksionist Təyyar Eyvazov bildirib ki, virusun ötürülməsi xəstə heyvan, insan və ya virusla çirklənən materiallarla təmas yolu ilə keçir.
“Viruslar bədənə zədələnən dəri, nəfəs yolları və ya selikli qişalarla (ağız, burun, göz) daxil olur. Heyvandan insana isə dişləmə, cırmaqlama, ov ətinin yeyilməsi, bədən mayeləri ilə birbaşa və yara materialları ilə dolayı yolla keçir. Xəstəliyin insandan insana, ilk növbədə, iri respirator damcılarla keçdiyi düşünülür. Yoluxma üçün uzunmüddətli və sıx təmas olmalıdır.
Xəstəliyin gizli dövrü adətən 5-21 gün olduğu hesablanıb. 5 günədək davam edə bilən başlanğıc dövrdə qızdırma, şiddətli baş ağrısı, limfa düyünlərinin böyüməsi, bel və əzələ ağrıları, bəzən kataral və mədə-bağırsaq əlamətlərinə rast gəlinir. Temperaturun başlamasından 1-3 gün sonra təbii çiçəyi xatırladan xarakterik qovucuqlu səpgilər yaranır. Bu səpgilər üz nahiyəsindən başlayır və bədənin digər nahiyələrinə keçir. Ölüm hallarının tezliyi 0-10 faiz arasında dəyişir”, - deyə infeksionist qeyd edib.
Qeyd edək ki, Afrika İttifaqının Xəstəliklərə Nəzarət və Qarşısının Alınması Mərkəzi (Afrika CDC) tərəfindən paylaşılan məlumatlara görə, qitənin 13 ölkəsində meymunçiçəyi virusuna yoluxma halları aşkarlanıb. Bu ölkələr Cənubi Afrika, Keniya, Ruanda, Uqanda, Konqo Demokratik Respublikası, Burundi, Mərkəzi Afrika Respublikası, Konqo Respublikası, Kamerun, Nigeriya, Kot-d'İvuar, Qana və Liberiyadır. Yoluxma sayının 17 min 541, xəstəlik səbəbi ilə qeydə alınan ölüm göstəricisinin isə 517 olduğu bildirilir. Ölüm sayının 97 faizi Konqo Demokratik Respublikasının payına düşür.
Bundan başqa, virus Afrika qitəsindən kənarda üç ölkədə - İsveç, Avstraliya və Pakistanda görülüb. Bu günədək yoluxanların sayının Avstraliyada 93, Pakistanda 3 və İsveçdə 1 nəfər olduğu bildirilir.
