Bu gün gəncəli Xalq artisti Şahmar Ələkbərovun anadan olmasının 81 ili tamam olur. O, 23 avqust 1943-cü il tarixində Gəncədə dünyaya göz açıb. Azərbaycan İncəsənət İnstitutunun aktyorluq fakültəsində Rza Təhmasibin kursunda təhsil alıb. Hələ üçüncü kursda oxuyarkən Azərbaycan Dövlət Akademik Milli Dram Teatrına işə götürülüb. Adil İsgəndərov onu kinostudiyanın nəzdində özünün yaratdığı "Kinoaktyor" studiyasına dəvət edib.
Şahmar Ələkbərovun ilk aktyor karyerası “Dağlarda döyüş”dən başlamışdı. “Dağlarda döyüş”, “Mən ki gözəl deyildim”, “İntizar”, “Yeddi oğul istərəm”, “Axırıncı aşırım”, “Qızıl qaz”, “Qatır Məmməd”, “Firəngiz”, “Arxadan vurulan zərbə”, “Babək”, “Əlavə iz”, “Qanlı zəmi” və s. filmlərdə yaddaqalan obrazlar yaradıb. “İmtahan” (G.Əzimzadə ilə birlikdə), “Sahilsiz gecə”, “Qəzəlxan” filmlərinin quruluşçu rejissorudur. O, 1989-cu ildə Azərbaycanın Xalq artisti fəxri adına layiq görülüb.
Şahmar Ələkbərov 12 avqust 1992-ci ildə vəfat edib.
