Sadıllı qəsəbəsinin İmran Qasımov küçəsi və qəsəbənin mərkəzi yollarından hesab olunan Bilal Qəhrəmanov küçəsində asfalt örtüyü ilə bağlı narazılıqlar artıb.
Gencexeber.az-a sakinlər tərəfindən daxil olan çoxsaylı şikayətlərə əsasən, Bilal Qəhrəmanov küçəsində, "Nur" marketin qarşısında mövcud asfalt örtüyü III MDB oyunları ərəfəsində Gəncə şəhərində aparılan genişmiqyaslı təmir-bərpa və kommunikasiya yenilənməsi işləri zamanı dağıdılıb. Lakin sözügedən işlər yekunlaşsa da, yolun bərpası indiyədək həyata keçirilməyib. Nəticədə həm piyadaların, həm də avtomobillərin hərəkəti xeyli çətinləşib.
Bilal Qəhrəmanov küçəsi ilə kəsişən İmran Qasımov küçəsində isə ümumiyyətlə asfalt örtüyü mövcud olmayıb. Sakinlər bildirirlər ki, illərdir bu vəziyyətlə barışmaq məcburiyyətində qalsalar da, hazırda həyat şəraitinin yaxşılaşdırılması məqsədilə burada da asfalt örtüyünün salınmasını arzulayırlar.
Vətəndaşların sözlərinə görə, şəhər rəhbərliyinin nəzarəti altında Gəncə ərazisində 130-a yaxın yolun uğurla təmir edildiyi bir vaxtda İmran Qasımov küçəsinin bu prosesdən kənarda qalması onları narahat edir. Sakinlər məsələ ilə bağlı Gəncə Şəhər İcra Hakimiyyəti tərəfindən müvafiq addımların atılacağına ümid edirlər.
