Gəncə şəhərində nöqsanlar aşkarlanan dönərxanaların fəaliyyəti məhdudlaşdırılıb. Bu haqda 4 iyun tarixində AQTA-ya istinadən xəbər veririk.
Azərbaycan Respublikasının Qida Təhlükəsizliyi Agentliyi əməkdaşları tərəfindən şəhərdəki ictimai iaşə müəssisələrində yoxlamalar keçirilib. Yoxlamalar Heydər Əliyev prospekti, 3B ünvanında fəaliyyət göstərən “Şah dönər”, Nəriman Nərimanov prospekti, 33 ünvanında fəaliyyət göstərən “Mustafa dönər” və “Sultan dönər”də aparılıb.
Tədbir zamanı dönərxanalarda qida təhlükəsizliyi sahəsində qüvvədə olan normativ hüquqi aktların, sanitariya norma və qaydalarının tələblərinin pozulduğu məlum olub. Dönər ətlərinin emalı üçün xüsusi sahənin ayrılmadığı, temperatur rejiminə əməl olunmadığı, işçilər üçün ayrıca əl yuma çanaqlarının təşkil edilmədiyi, işçi heyətin xüsusi geyim və fərdi mühafizə vasitələri ilə təmin edilmədiyi və digər nöqsanlar aşkarlanıb.
Faktlarla bağlı qanunvericiliyə uyğun olaraq, müəssisə rəhbərlikləri barəsində inzibati qaydada tədbir görülüb, dönərxanaların fəaliyyəti məhdudlaşdırılıb.
