Gəncə şəhər 46 saylı körpələr evi–uşaq bağçasında dam örtüyünün təmir olunmasına baxmayaraq, valideynlər binanın daxili vəziyyətindən narazıdırlar.
Gencexeber.az-a valideynlər tərəfindən daxil olan şikayətlərə əsasən, təhsil müəssisəsində tavanların beton hissələri tökülür, döşəmələr çöküb, otaqlarda isə rütubət hökm sürür. Cari ilin fevralın 27-də güclü külək nəticəsində dam konstruksiyası aşan binada sonradan təmir-bərpa işləri aparılıb. Lakin valideynlərin sözlərinə görə, damın yenilənməsi müəssisədə mövcud olan digər problemləri aradan qaldırmayıb.
Onlar iddia edirlər ki, bağçanın müxtəlif hissələrində tavanların beton konstruksiyası ovularaq tökülür, divarların boyası qopub. Valideynlər xüsusilə tədris və yataq otaqlarında müşahidə olunan nəmişliyin uşaqların sağlamlığı üçün risk yaratdığını bildirirlər.
Valideynlərin sözlərinə görə, vəziyyəti çətinləşdirən digər məqamlardan biri də 7 saylı körpələr evi–uşaq bağçasının da hazırda 46 saylı bağçanın binasında fəaliyyət göstərməsidir. Bildirilir ki, 7 saylı bağçanın binası təxminən 5 ildir təmir səbəbindən istifadəyə bağlanıb.
Qeyd olunur ki, həmin bağçanın uşaqları üçün ayrılan otaqlar da baxımsız və şəraitsiz vəziyyətdədir. Valideynlər aidiyyəti qurumlardan məsələni araşdırmağı və müəssisədə mövcud problemlərin aradan qaldırılması üçün tədbirlər görməyi xahiş edirlər.
