Xəbər verdiyimiz kimi, ötən gün Qazaxın Xanlıqlar kəndində "SOCAR Petroleum" QSC-yə məxsus 7 saylı neft bazası sahəsində partlayışla müşayiət olunan yanğın baş verib. Hadisə nəticəsində neft bazası sahəsində süzücü-doldurucu vəzifəsində çalışan Şəmil Zabit oğlu həyatını itirib.
Qafqazinfo.аz mərhumun fotosunu təqdim edib.
14:26
Qazaxda baş verən hadisədə bir nəfər ölüb, bir nəfər isə xəsarət alıb.
Gencexeber.az-ın məlumatına görə ölən şəxsin - 1994-cü il təvəllüdlü Şəmil İbrahimovun meyiti aidiyyəti üzrə təhvil verilib.
Xəsarət alan şəxs isə xəstəxanaya yerləşdirilib.
Hazırda hadisə yerinə hüquq mühafizə orqanlarının əməkdaşları cəlb edilib.
13:41
Fövqəladə Hallar Nazirliyinin "112" qaynar telefon xəttinə Qazax rayonu, Xanlıqlar kəndi ərazisində yanacaq daşıyan avtomobildə yanğın baş verməsi barədə məlumat daxil olub.
Gencexeber.az FHN-ə istinadən xəbər verir ki, məlumatla əlaqədar dərhal əraziyə FHN-in Dövlət Yanğından Mühafizə Xidmətinin Qazax rayon Yanğından Mühafizə Hissəsinin qüvvələri cəlb olunub.
Yanğınsöndürənlər tərəfindən həyata keçirilmiş zəruri və təxirəsalınmaz tədbirlər sayəsində yanğın genişlənməsinə imkan verilmədən qısa müddətdə məhdudlaşdırılıb.
Hazırda yanğının tam söndürülməsi istiqamətində tədbirlər davam edir.
