Göygöl şəhərində güclü küləklə müşahidə olunan leysan yağış bir sıra fəsadlara səbəb olub.
Gencexeber.az-ın məlumatına görə, təbiət hadisəsi iyunun 11-də saat 04:30 radələrində başlayıb. Güclü külək, şimşək və intensiv yağış nəticəsində şəhərin müxtəlif ərazilərində ağaclar aşıb.
Belə ki, Məhəmməd Əmin Rəsulzadə küçəsində, Göygöl şəhər 3 nömrəli tam orta məktəbin qarşısında ağac "Nissan Sunny" markalı avtomobilin üzərinə düşüb. Həmin küçədə daha bir ağacın aşdığı bildirilir.
Bundan başqa, Səbuhi Hacıyev küçəsində, Göygöl Rayon Texniki və Təbiət Fənləri Təmayüllü Liseyin qarşısında evakuatorun üzərinə də ağac aşıb.
Məlumata görə, şəhərin Heydər Əliyev prospektində də bir neçə ağacın aşması qeydə alınıb. Həmçinin fərdi yaşayış evlərinin həyətlərində də ağacların aşdığı bildirilir.
İlkin məlumata əsasən, hadisələr zamanı xəsarət alan olmayıb.
Faktla bağlı aidiyyəti qurumlar tərəfindən ərazilərdə təmizlik və təhlükəsizlik tədbirləri görülür.
