Kəpəz dağı üzərində yerləşən və yerli əhali arasında "Qar mağarası" kimi tanınan təbii mağaranın girişi qaya uçqunu nəticəsində bağlanıb.
Kəpəz Dağçılıq Klubundan Gencexeber.az-a verilən məlumata görə, hadisənin son günlər yağan güclü yağışlardan sonra baş verdiyi ehtimal olunur. Klub üzvləri dünən Kəpəz zirvəsinə yürüş zamanı əraziyə baxış keçirərkən mağaranın giriş hissəsinin iri qaya parçaları ilə tamamilə bağlandığını müşahidə ediblər.
Qeyd edək ki, dəniz səviyyəsindən 3 066 metr yüksəklikdə yerləşən Kəpəz dağındakı "Qar mağarası" yay aylarında belə daxilində qarın qalması ilə tanınır və dağçıların, eləcə də təbiətsevərlərin tez-tez üz tutduğu məşhur məkanlardan biri olub. Hazırda mağaraya giriş mümkün deyil.
