Tovuz rayonunun kəndlərindən birində 2000-ci il təvəllüdlü Təhməz birgə yaşadıqları evdə arvadı Suranı yumruqla vurub.
Təhməzin barəsində Cinayət Məcəlləsinin 128-ci maddəsi ilə ittiham elan edilib.
İş üzrə izahat verən Təhməz ona elan olunmuş ittiham üzrə özünü təqsirli bilib. O, ifadəsində göstərib ki, hadisə günü yatarkən Sura telefonunun kodunu açıb və başqa qadınlarla mesajlaşdığını görüb, telefonu sındırıb.
Təqsirləndirilən şəxs ifadəsinin sonunda əməlindən peşmançılıq hissi keçirdiyini, zərərçəkmiş şəxslə barışaraq bir evdə yaşadığını, qadının ondan heç bir şikayət və tələbinin olmadığını deyib.
İş üzrə zərərçəkmiş Suranın sözlərinə görə, əri Təhməzin uzun müddətdir ona xəyanət etməsindən şübhələnib: "Məlum hadisə günü Təhməzin telefonunu yoxladım və ərimin bir neçə qadınla mesajlaşdığını gördüm. Gördüyüm mesajlara əsəbiləşərək onun telefonunu sındırdım. Sonra Təhməzi yuxudan oyadaraq telefonda gördüyüm yazışmaları soruşdum. O isə əvvəlcə məndən telefonunu istədi. Vermədikdə isə məni yumruqla döyməyə başladı".
Tovuz Rayon Məhkəməsinin hökmü ilə təqsirləndirilən şəxsin zərərçəkmişlə barışdığı nəzərə alınıb və o, cinayət məsuliyyətindən azad edilib. Hökmə əsasən, onun barəsində olan cinayət işi üzrə icraata xitam verilib.
Mənbə: demokrat.аz
