Gəncədə pravoslavların bayramı qeyd olunub. Bu haqda 6 may tarixində İcra Hakimiyyətinə istinadən məlumat veririk.
Tədbir Aleksandr Nevski adına Rus Pravoslav kilsəsində təşkil olunub. Burada Pasxa bayramı keçirilib. Qərb bölgəsində yaşayan pravoslavlar məbədə toplaşıb, İsa Məsihin çarmıxa çəkilməsindən üç gün sonra dirilməsini qeyd ediblər.
Kilsədə icra edilən mərasimlərə İcra Hakimiyyəti başçısı Aparatının məsul əməkdaşları və Dini Qurumlarla İş üzrə Dövlət Komitəsinin Gəncə bölgəsi üzrə şöbəsinin nümayəndələri qatılıblar. Burada öncə Prezident İlham Əliyevin pravoslavlara ünvanladığı təbrik məktubu oxunub. Ölkəmizdə daimi sülh, əmin-amanlıq və xoşbəxtliyin hökm sürməsi arzulanıb. Həmçinin şəhidlərin ruhuna dualar oxunub.
Daha sonra Pasxa bayramında vacib sayılan bir sıra dini ayinlər icra edilib, şamlar yandırılıb, dualar səsləndirilib.
İcra başçısı Niyazi Bayramov burada yaşayan pravoslavları Pasxa bayramı münasibətilə təbrik edib. Şəhər rəhbəri tərəfindən Aleksandr Nevski adına Rus Pravoslav Kilsəsinə bayram sovqatı göndərilib.
