Gəncədə üç nəfər ictimai asayişi pozduğu üçün saxlanılıb. Bu haqda Gencexeber.az 29 dekabr tarixində məlumat verir.
DİN-in Mətbuat Xidmətinin Gəncə regional qrupunun baş inspektoru, polis kapitanı Eşqin Qasımovun redaksiyamıza verdiyi məlumata əsasən, Baş Polis İdarəsinin əməkdaşları dekabrın 28-i axşam saatlarında şəhər ərazisində yerləşən meydanların birində T. Haqverdiyev, Y. Cəfərov və İ. Əliyevi saxlayıblar. Buna səbəb həmin şəxslərin pirotexniki vasitələrdən istifadə edərək ictimai asayişi pozması və vətəndaşların haqlı narazılığına səbəb olmasıdır.
Adıçəkilən şəxslər 1-ci Polis Şöbəsinə gətiriliblər. Onlarla profilaktiki söhbət aparılıb, pirotexniki vasitələrdən istifadənin qadağan və təhlükəli olduğu bildirilib, barələrində inzibati tədbir görülüb.
Baş Polis İdarəsinin əməkdaşları şəhər ərazisində pirotexniki vasitələrin satışı və istifadəsinə qarşı analoji monitorinqləri davam etdirir. Vətəndaşlardan xahiş olunur ki, bu tip vasitələrdən istifadə etməsinlər, özlərinin və digərlərinin sağlamlığını təhlükəyə atmasınlar.
