Azərbaycan Respublikasının Elm üzrə Prezident mükafatçısı, Prezident təqaüdçüsü, "Ümumdünya Gənc Alimlər Forumu"nun Vitse-prezidenti, gənc tədqiqatçı Elnur Həsənovun doğum günüdür.
Gencexeber.az məlumat verir ki, Elnur Lətif oğlu Həsənov 15 mart 1987-ci ildə Gəncədə anadan olub. O, 2004-2008-ci illərdə Gəncə Dövlət Universitetinin Tarix fakültəsinin bakalavr pilləsində, 2009-2011-ci illərdə həmin fakültənin Azərbaycanın yeni və müasir tarixi ixtisası üzrə magistratura şöbəsində təhsil alıb.
Dünyanın 96 ölkəsinin yüksək impakt faktorlu akademik nəşrlərində 500-ə qədər elmi məqalə, tezis və kitab (monoqrafiya) çap etdirmiş gəncəli alimin müəllifi olduğu əsərlər "Web of Science" (Clarivate Analytics), "Scopus" (Elsevier), "Google Scholar" və digər beynəlxalq elmmetrik bazaların nəşrlərində dərc olunub. Bu elmi əsərlər Azərbaycan dili ilə yanaşı, türk, ingilis, alman, ərəb, fransız, rus, ispan, italyan, rumın, portuqal və digər xarici dillərdə çap edilib.
İtaliya Elm Nəşriyyatları İttifaqının və İsveç Kral Akademiyasının üzvü, Avstriyanın BOKU tədqiqat universitetinin, Yaponiyanın "Elm" cəmiyyətinin və Almaniyanın Frankfurt-Höte universitetinin fəxri üzvü olan gənc alim Elnur Həsənovun namizədliyi Nobel mükafatı Komitəsinə irəli sürülüb.
Elnur Həsənov "Elmi İstinadda Rekord" diplomuna layiq görülən ən gənc alimdir. Onun elmi əsərlərinə dünya alimləri tərəfindən 2180 dəfə istinad edilmişdir. Bu, Azərbaycanda gənc tədqiqatçılar arasında ictimai-humanitar elmlər üzrə ən yüksək göstəricidir.
Təsadüfi deyildir ki, Gəncə tarixinə dair arxiv sənədlərinin, həmçinin şəhərin antropoloji, etnoqrafik və arxeoloji irsinin tədqiqinə, memarlıq abidələrinin öyrənilməsinə həsr olunan çoxsaylı elmi əsərlərinə görə gənc alim dəfələrlə ölkəmizin və bir sıra nüfuzlu beynəlxalq elmi qurumların təltifləri ilə mükafatlandırılıb.
