İcra başçısı Gəncə Ekoloji Park Kompleksində aparılan tikinti işləri ilə tanış olub. Bu haqda 1 fevral tarixində Gəncə Şəhər İcra Hakimiyyəti MKTİB-nin mətbuat xidmətinə istinadən xəbər veririk.
Gəncə şəhəri, Əli Məmmədov küçəsində yeni Ekoloji Park Kompleksinin tikinti işləri sürətlə davam etdirilir. Gəncə Şəhər İcra Hakimiyyətinin başçısı Niyazi Bayramov növbəti dəfə əraziyə baş çəkib, kompleksdə aparılan tikinti işlərinə baxış keçirib.
Layihənin müəllifi Ramiz Hüseynov şəhər rəhbərinə aparılan işlər barədə məlumat verib. O bildirib ki, hazırda ümumi sahəsi 2100 kvadratmetr olan 3 mərtəbəli oranjereya binasının inşası davam etdirilir. Binanın əsas hissəsi dəmir, beton, metal və şüşə-vitraj konstruksiyalarından yığılır. Burada müxtəlif gül, çiçək, ağac və digər nadir bitki növləri yetişdiriləcək. O cümlədən kompleksdə əyləncə mərkəzləri, idman qurğuları, iaşə obyektləri, habelə müxtəlif növ balıqlar üçün akvariumlar tikiləcək. Həmçinin binanın ətrafında abadlıq və quruculuq işləri də aparılacaq.
Layihə müəllifi onu da qeyd edib ki, buranı ziyarət edən qonaqlar, eyni zamanda Gəncə Şəhər Mənzil Kommunal Təsərrüfatı İstehsalat Birliyinin Yaşıllaşdırma şöbəsinin Gülçülük sahəsi ilə də yaxından tanış olmaq imkanı əldə edəcəklər.
Niyazi Bayramov Ekoloji Park Kompleksində aparılan işlərlə tanış olduqdan sonra müvafiq tapşırıq və tövsiyələrini verib.
