Bazarlarda yerli quzu ətinin qiyməti 20-22 manata çatdığı halda, alıcılara 11-12 manata dondurulmuş quzu əti təklif olunur. Satıcıların sözlərinə görə, sözügedən məhsul Monqolustandan idxal edilir.
Bəzi alıcılar qiymət fərqinə görə dondurulmuş ətə üstünlük versələr də, digərləri yalnız yerli məhsul aldıqlarını bildirirlər. Vətəndaşlar arasında hər iki növ ətdən istifadə etdiyini və dad baxımından ciddi fərq hiss etmədiyini deyənlər də var.
Qida üzrə ekspert Seymur Qafarov dondurulmuş ətin keyfiyyətsiz olması ilə bağlı fikirlərin doğru olmadığını bildirib. Onun sözlərinə görə, bu cür məhsulların əsas xüsusiyyəti uzun müddət saxlanılmaq üçün dondurulmasıdır.
"Bu tip ətlər sadəcə zaman olaraq daha uzun müddət saxlanılmaq üçün nəzərdə tutulur", – ekspert qeyd edib.
Məsələ ilə bağlı açıqlama verən Azərbaycan Qida Təhlükəsizliyi Agentliyi (AQTA) isə bildirib ki, ölkəyə idxal olunan ət və ət məhsulları yüksək riskli məhsul qrupuna aid olduğundan ciddi təhlükəsizlik və keyfiyyət nəzarətindən keçirilir. Habelə müvafiq laborator müayinələrdən keçdikdən sonra dövriyyəyə buraxılır.
Mənbə: AzTV-nin süjeti
