Xəbər verdiyimiz kimi, Gəncənin Məhsəti qəsəbəsində, 21 nömrəli məktəbin yaxınlığında yerləşən avtobus dayanacağının ətrafında antisanitar vəziyyət yaranıb.
Gencexeber.az-a şəhərin Mənzil Kommunal Təsərrüfatı İstehsalat Birliyindən (MKTİB) verilən məlumata görə, ərazidə yaranan anitisanitar vəziyyət qurumun 5 saylı Ərazi Xidmət Sahəsi tərəfindən qısa zamanda aradan qaldırılıb. Adıçəkilən ünvanda yerləşən dayanacaq və ətrafı ərazi xidmət sahəsinin əməkdaşları tərəfindən təmizlənib, alaq otları biçilib, yığılan tullantıların aidiyyəti üzrə daşınması təmin olunub.
MKTİB-dən bildirilib ki, avtobus dayanacağı yerləşdiyi ərazi mütəmadi olaraq məişət və digər tullantılarla çirkləndirilir. Bunu həm dayanacaqdan istifadə edən sərnişinlər, həm də ətrafında yaşayan sakinlər edir.
MKTİB bir daha əhaliyə müraciət edərək məişət və s. tullantılarını bunun üçün ayrılmış xüsusi yerlərdəki konteynerlərə atmalı olduqlarını xatırladıb. Əlavə edilib ki, əks halda sanitariya qaydalarını pozan vətəndaşlar inzibati məsuliyyətə cəlb olunacaq.
