“Qapını əlləri və ayaqları ilə vuraraq “aç qapını, səni istəyirəm, aç qapını” deyirdi”
Gencexeber.az-ın əldə etdiyi məlumata görə, bu sözləri məhkəmə qarşısında qonşusu Azər Sadıqov (ad şərtidir) tərəfindən təcavüzə uğrayan zərərçəkmiş Banu Quliyeva (ad şərtidir) deyib.
Belə ki, Mingəçevirdə yaşayan 1981-ci il təvəllüdlü Azər Sadıqov işdən evə gəlib, bir qədər spirtli içki qəbul edərək yüngül dərəcəli sərxoş olub. Bu zaman cinsi ehtirası təmin etmək məqsədi ilə qonşuluqda yaşayan kişinin evdə olmadığını yoxlayıb. Evdə olmadığından əmin olduqdan sonra pəncərədən evə daxil olub. Və Banu Quliyevanın (ad şərtidir) hamamdan çıxdığını görüb onunla cinsi əlaqədə olmaq istədiyini bildirib. Banu qorxaraq mənzilin qonaq otağına keçib. Qapını qıraraq Azər içəri daxil olanda Banu qışqıraraq qonşuları səsləyib. Qonşuların gəlməsindən qorxaraq evi tərk edib.
Təqsirləndirilən şəxsə qarşı Cinayət Məcəlləsinin 29, 149.1, 157.1-ci maddəsi ilə cinayət işi açılıb. Məhkəmə istintaqına Şəki Ağır Cinayətlər Məhkəməsində hakim Bilal Məmmədov sədrliyi ilə baxılıb.
Məhkəmə istintaqı zamanı təqsirləndirilən Azər Sadıqova ifadə vermək üçün şərait yaradılıb. O, törətdiyi əməldə özünü təqsirli bilməyərək ifadəsində deyib ki, həmin günlə bağlı heç nə xatırlamır:
“Hadisə baş verən gün spirtli içkinin təsiri altında idim. Öz evimə gəldikdən sonra harada və kiminlə görüşdüyümü xatırlamıram. Qonşunun evinə girməmişəm, Banuya toxunmamışam. Heç nə xatırlamıram”.
Məhkəmə istintaqı zamanı zərəçəkmiş şəxs qismində dindirilmiş Banu Quliyeva ifadəsində göstərib ki, övladlarını yataq otağında yatızdırdıqdan sonra qapını bağlayaraq yuyunmaq üçün hamam otağına keçib:
“Bir neçə dəqiqə sonra hamam otağından çıxıb dəsmala bükülərək qonaq otağına keçərkən yataq otağının qapısının açıldığını gördüm. Həmin vaxt yataq otağında uşaqlardan birinin oyanmasından şübhələndim. Lakin yataq otağına keçmədən qonşudakı Azərin dəhlizdə əlində bıçaqla durduğunu gördüm. Qorxub qonaq otağına qaçdım, qapını arxadan kilidlədim. Və evi tərk etməsini tələb etdim.
Qapını əlləri və ayaqları ilə vuraraq “aç qapını, səni istəyirəm, aç qapını” deyə qışqırırdı. Qapını aça bilmədiyini görüb əlində olan bıçaqla qapının tutacaq yerini zədələyərək sındırdı. Həmçinin bıçağın tutacaq yeri ilə qapının şüşəsinə də bir neçə dəfə vuraraq şüşəni çatlatdı. Qonşuları səsləməyə başlayanda qorxaraq qaçdı”.
Məhkəmədə şahidlər və zərərçəkmiş tərəflər ifadə verib. Verilən ifadələr və aparılan araşdırmalarla Azər Sadıqov cinayətdə təqsirli bilinib.
Sonda məhkəmənin yekun qərarı ilə Azər Sadıqov 5 il 1 ay müddətində azadlıqdan məhrum edilib. O, azadlıqdan məhrumetmə cəzasını ciddi rejimli cəzaçəkmə müəssisəsində çəkəcək.
Fidan İlqar
