Bu gün Azərbaycanın şair-dramaturqu Aydın Murovdağlının doğum günüdür.
Gencexeber.az məlumat verir ki, Azərbaycan Yazıçılar və Azərbaycan Jurnalistlər birliklərinin üzvü, Prezident mükafatçısı, "Həsən bəy Zərdabi" mükafatı laureatı, Respublika Ziyalılar Cəmiyyətinin Fəxri Ziyalısı adına layiq görülmüş (2006) Aydın Murovdağlı 22 may 1954-cü ildə Qərbi Azərbaycanın Göyçə mahalının Zod kəndində, ziyalı ailəsində anadan olub.
Gəncədə yaşayıb yaradan yazıçı qələmindən çıxan "Qızıl güllər tonqalı", "Qapısız dünya", "Dirilən ağrılar", "Yuxusuz işıq" və s. kimi 20-dən çox bədii, publisistik kitabları geniş oxucu kütləsinin rəğbətini qazanıb. Onun Qədim Gəncənin 4000 illik tarixinə həsr etdiyi "Keçmişin gələcəyində görüş" adlı pyesi ədəbi irsə ehtiramın bariz nümunəsidir. Poeziya sahəsində də dərin iz qoyan şair, "Ali Baş Komandan", "Görən saat neçədi?!", "Səsini eşitdim göz yaşlarının", "Haralısan?!", "Çəkin bu şəhəri qızıl suyuna", "Min ildi ağlayır Gəncə qapısı", "Gəncəmizin" adlı qəzəl və yüzlərlə lirik və vətənpərvər ruhlu populyar şeirlərin müəllifidir.
Bununla yanaşı, onun "Şeyx Şamil", 44 günlük Vətən müharibəsindəki tarixi qələbəmizə həsr olunmuş "Əbədiyyət Marşalı", Nizami Gəncəvinin 870 illiyinə həsr etdiyi "Zəlzələ" və Mirzə Şəfi Vazehin 220 illik yubileyinə həsr olunan "Ruhların söhbəti" pyesləri milli dramaturgiyamızı zənginləşdirən əhəmiyyətli səhnə əsərlərindəndir. Onun əsərləri bir sıra xarici dillərə tərcümə olunub. Türkiyə, Özbəkistan, Rusiya, Ukrayna, İranda və digər ölkələrdə nəşr olunub.
