Gəncə Dövlət Dram Teatrına “Milli” statusunun verilməsi həmin teatrın adında və fəaliyyətində özünü göstərəcək. Bu haqda 21 may tarixində Report-a istinadən xəbər veririk.
"Milli" statusu alan Dram Teatrının adı dəyişdirilir və işçilərinin əməkhaqqına 50 faiz əlavə olunur. Mədəniyyət ocağına “Milli” statusu onun milli mədəniyyətin təbliği sahəsində müstəsna xidmətlərinə görə, uzun illər səmərəli fəaliyyəti, ölkə daxilində və xaricdə əldə etdiyi nailiyyətləri, 10 illik proqnoz göstəriciləri və digər meyarlar nəzərə alınmaqla Mədəniyyət Nazirliyinin təqdimatı əsasında Nazirlər Kabineti tərəfindən verilib.
Bununla bərabər, teatrın adına "milli" sözünün əlavə edilməsi də nəzərdə tutulur. Bu, mövcud qaydalara uyğun həyata keçiriləcək. Teatrın adı bundan sonra Gəncə Dövlət Milli Dram Teatrı şəklində qeyd ediləcək.
Xatırladaq ki, 16 may tarixində Nazirlər Kabineti tərəfindən teatra “Milli” statusu verilib.
