Gencexeber.az məlumat verir ki, bu gün Azərbaycanın Milli Qəhrəmanı, telereportyor Çingiz Mustafayevin anadan olduğu gündür.
Çingiz Fuad oğlu Mustafayev 1960-cı il avqustun 29-da hərbçi ailəsində dünyaya göz açıb.
O, həkim olsa da, jurnalistikaya böyük həvəsi olub. Çingiz 1990-cı il yanvarın 20-də Sovet ordusunun Bakıda törətdiyi vəhşilikləri lentə alıb. 1991-ci ildən isə həyatını jurnalistikaya tam bağlayıb.
Çingiz Mustafayev Azərbaycan tamaşaçısına hər bir reportajı ilə tanış olsa da, dünya onu daha çox Xocalıda çəkdiyi kadrlarla tanıyıb. Onun məhz bu kadrları ilə Ermənistanın imici bütün dünyada ciddi sarsıntıya məruz qalıb. O, döyüş zonalarına yalnız reportyor kimi yollanmayıb. Cəbhədə bir əsgər, zabit və hətta komandan kimi çox vəzifəni öz üzərinə götürüb.
İyunun 15-i 1992-ci ildə Xocalı rayonunun Naxçıvanlı kəndində çəkiliş zamanı aldığı mərmi qəlpəsindən həlak olan Çingiz, sonadək kameranı söndürməyib.
Azərbaycan Respublikası prezidentinin 1992-ci il noyabrın 6-sı tarixli fərmanı ilə Çingiz Fuad oğlu Mustafayev ölümündən sonra "Azərbaycanın Milli Qəhrəmanı" adına layiq görülüb. O, 1992-ci ildə Bakıda Şəhidlər xiyabanında dəfn edilib.
