"Artıq çayın məcrasında aparılan təmizlik işləri ənənə halını alıb və hər həftə təşkil olunur. Amma aparılan təmizlik işlərinə baxmayaraq, məsuliyyətsiz sakinlərin və sahibkarların davranışı nəticəsində Gəncəçayın bəzi hissələrində natəmizlik hökm sürür".
Bu barədə Gəncə şəhər Mənzil Kommunal Təsərrüfatı İstehsalat Birliyinin Gencexeber.az-a açıqlamasında bildirilib.
Qurum əlavə edib ki, dəfələrlə edilən xəbərdarlıqlara baxmayaraq, çayın sağ və sol hissəsində yaşayan, həmçinin fəaliyyət göstərən iaşə obyektləri gündəlik "zibillərini" çaya atırlar:
"Gəncə şəhər Mənzil Kommunal Təsərrüfatı İstehsalat Birliyi Gəncəçayın ətrafında yaşayan və fəaliyyət göstərən sakinlərdən, iaşə obyektlərindən, restoran və kafe sahiblərindən bir daha xahiş edir ki, ən azından çayın təmizlənməsi kimi ağır bir işin öhdəsindən gəlmək üçün çalışan işçilərin əməyinə hörmət naminə şəhərimizin təmizliyinin qorunub saxlanılmasına dəstək nümayiş etdirərək, məişət tullantılarını çayın ərazisinə deyil, bunun üçün təyin olunmuş konteynerlərə və ya zibil qutularına atsınlar".
Habelə ekologiyaya zərər verən vətəndaşlar aşkar edilərək inzibati qaydada məsuliyyətə cəlb olunacaqları bildirilib.
Qeyd edilib ki, Gəncəçayda su axarının güclü təzyiqi səbəbindən genişmiqyaslı təmizlik işlərinin aparılması hazırda mümkün olmadığı üçün sözügedən ərazidə iməcilik işləri çay axarının azalması zaman həyata keçiriləcək.
