Gəncədə yerləşən və hazırda bərpa olunan "Nizaminin evi"ndə yeni filmin çəkilişi planlaşdırılır.
Bu barədə Gencexeber.az-a Bakı Abadlıq Xidmətinin baş memarı Rüfət Quliyev məlumat verib. Onun sözlərinə görə, Gəncənin Bala Bağman yaşayış massivində yerləşən, 1982-ci ildə "Nizami" bədii filminin çəkilişləri üçün inşa edilmiş kinopavilyonda böyük Azərbaycan memarı Əcəmi Naxçıvaninin həyat və yaradıcılığına həsr olunan "Memar Əcəmi" filminin bir sıra səhnələri lentə alınacaq.
Bildirilib ki, hazırda ərazidə genişmiqyaslı bərpa və yenidənqurma işləri həyata keçirilir. Hasarlar, giriş darvazası və kinopavilyonun əsas binası təmir olunur, zədələnmiş dam örtüyü yenidən qurulur. Eyni zamanda, filmin çəkilişi üçün tarixi elementlərin qorunması və zərurət yarandıqda yeni dekorativ elementlərin əlavə olunması istiqamətində işlər görülür. Bütün proses mütəxəssislərin nəzarəti altında aparılır.
Qeyd edək ki, Əcəmi Naxçıvaninin həyat və yaradıcılığından bəhs edən bədii-sənədli film hazırda istehsalat mərhələsindədir. Ekran əsərinin çəkilişlərinə Naxçıvanın Ordubad rayonunda başlanılıb. Filmdə dahi memarın Şərq memarlığına verdiyi töhfələrin və yaratdığı memarlıq məktəbinin geniş tamaşaçı auditoriyasına çatdırılması nəzərdə tutulur.
Xatırladaq ki, uzun illər baxımsız vəziyyətdə qalan "Nizaminin evi"ndə bir müddət əvvəl təmir-bərpa işlərinə start verilib.
