Mingəçevirdə avtomobildə baş verən yanğın yaşayış evinin yanmasına səbəb olub.
Gencexeber.az-ın məlumatına əsasən, hadisə ötən gecə Mingəçevir şəhəri, Bahar küçəsi 17 ünvanında qeydə alınıb.
Şəhər sakini Tərlan Umarovun həyətindəki ona məxsus “Opel” markalı avtomobil anidən yanmağa başlayıb.
Ev sahibəsi Qənirə Kərimovanın sözlərinə görə, əvvəlcə həyətdə olan avtomobil yanıb. Daha sonra avtomobildə baş verən partlayış onların yaşadığı 3 otaqlı evin əşyaları ilə birgə yanmasına səbəb olub.
Q.Kərimova deyir ki, yanğın zamanı qızı uşaqları ilə birgə evdə olub. Hadisə zamanı ailə pəncərələrdən xəsarət almadan çıxa bilib.
Baş vermiş yanğın ailəyə xeyli miqdarda ziyan vurub. Əraziyə çağırılan FHN-nin Mingəçevir Dövlət Yanğın Nəzarəti Xidməti əməkdaşları yanğını söndürərək yaxınlıqdakı qonşu evlərə keçməsinin qarşısını alıblar.
Faktla bağlı araşdırma başlanıb.
